بمناسبة فوز المصرية جوي روماني ببطولة العرب للشطرنج سيدات تحت ٢٠ سنة، وردا على هذا السؤال المتكرر اللي جالي من أصدقاء وغير أصدقاء .. ليه بطولات الشطرنج مش مختلطة بين الرجالة والستات؟ رغم إن الشطرنج لعبة لا يؤثر فيها عامل القوة البدنية اللي بيرجح كفة الرجال في أغلب الرياضات ...
الإجابة ممكن أقسمها لنقطتين، الأولى هي إن فيه بطولات مختلطة كتير جدا، بس الاتحاد الدولي للشطرنج خصص بطولات معينة للنساء عشان يشجعهم على اللعب أولا، وعشان يجنبهم مواجهة الرجال اللي عادة بيبقوا أقوى، وده بيقودنا للنقطة التانية.
متوسط تصنيف اللاعبين الرجال أعلى من المتوسط عند السيدات، ومثال بسيط على ده، الأعلى تصنيفا بين الرجال متفوق على الأعلى تصنيفا بين السيدات بحوالي ٢٥٠ نقطة، وده فارق كبير جدا في الشطرنج.
طيب هل ده معناه إن الرجالة "أذكى" من السيدات؟
الحقيقة مفيش أي دليل علمي بيقول الرجالة أذكى من الستات، والأرقام الإحصائية اللي ذكرتها مش دليل برضه، لأن الإحصائيات رغم إنها دقيقة لكنها بتغفل عوامل مؤثرة وغير مشمولة في الإحصاء.
زي مثلا إن عدد لاعبات الشطرنج المسجلين في الاتحاد الدولي ١٤٪ بس من إجمالي المسجلين، والنسبة دي كانت ٤٪ فقط سنة ١٩٩٠، وده بيرجع لعوامل اجتماعية وثقافية كتير، العوامل اللي بتحد من فرص مشاركة النساء في كل شيء عموما.
وده طبعا سبب مباشر في انخفاض جودة اللعب عند السيدات، يعني بالبلدي كل ما عدد اللاعبين بيكون أكبر كل ما فرص ظهور قدرات عالية واستثنائية كذلك بتكون أكبر، حقيقة إحصائية بسيطة.
ومع ذلك، جوديث بولجار مثلا، اللي هي أقوى لاعبة شطرنج في التاريخ، هزمت الأسطورة جاري كاسباروف، وكان شديد الانفعال بعد الهزيمة، لأنه كان ليه تصريحات إن السيدات لا يستطعن مجاراة الرجال في الشطرنج أبدا .. إلى أن حطمت هذه الأسطورة جوديث بولجار.
عموما فيه مقال هينشر قريبا (إن شاء الله يعني) عن الشطرنج وبتكلم فيه عن هذا الموضوع بشيء من التفصيل.
الصفحة الرسمية لكاتب المقال :
تعليقات
إرسال تعليق